Մետապնևմովիրուս HMPV. Ի՞նչ է պետք իմանալ նոր տարածվող վարակի մասին և ի՞նչպես պաշտպանվել
Ի՞նչ է մարդու մետապնևմովիրուսը:
Հայտնաբերվել է 2001 թվականին՝ շնչառական վիրուս է։ Այն ազդում է վերին և ստորին շնչուղիների վրա և նմանություններ ունի այնպիսի վիրուսների հետ, ինչպիսին է շնչառական սինցիցիալ վիրուսը (RSV): Առողջապահության համաշխարհային կազմակերպությունը հայտնում է, որ այս պահին այն ակտիվ տարածում ունի Չինաստանում։ Սակայն, ինչպես հաղորդում է կազմակերպության (ԱՀԿ) Եվրոպական գրասենյակի ղեկավար Հանս Կլյուգեն, ըստ տեղական իշխանությունների տվյալների, հիվանդացության ծավալներն ու ինտենսիվությունը դեռևս մնում են նախորդ տարվա մակարդակից ցածր:
Հայաստանի Հիվանդությունների վերահսկման և կանխարգելման Ազգային կենտրոնի հաղորդագրության համաձայն՝ Հայաստանում իրականացված լաբորատոր հետազոտությունների արդյունքում 2023 թվականին հայտնաբերվել է մետապնևմովիրուսի 10 դեպք, իսկ 2024թ. հունվար-ապրիլ ամիսներին՝ 50 դեպք։ Ապրիլից մինչ այժմ իրականացված լաբորատոր հետազոտությունների արդյունքում մետապնևմովիրուս չի հայտնաբերվել։
Ո՞վքեր են ռիսկի գոտում
Թեև Մետապնևմովիրուսը կարող է վարակել բոլոր տարիքի մարդկանց, այնուամենայինիվ որոշ խմբեր ավելի խոցելի են՝
- Նորածիններ և փոքր երեխաներ
- Տարեցներ
- Իմունային անբավարարություն ունեցող անձինք.
Ախտանիշները
Ախտանշանները կարող են տարբեր լինել՝ մեղմից մինչև ծանր, որոնք նման են սովորական մրսածության կամ գրիպի ախտանիշներին.
Մեղմ ախտանիշներ.
- Քթից արտահոսք
- Կոկորդի ցավ
- Հազ
- Ջերմություն
Ծանր ախտանշաններ.
- Շնչառության դժվարացում
- Կրծքավանդակի ցավ
- Բրոնխիոլիտ կամ թոքաբորբ
Ինչպե՞ս է տարածվում
Վիրուսը տարածվում է օդակաթիլային ճանապարհով, կամ երբ տեղի է ունենում սերտ շփում վարակված անձանց հետ։ Հնարավոր է վարակվել նաև շոշափելով աղտոտված մակերեսները, ապա դիպչելով դեմքին:
Բուժում և վերահսկում
Ներկայումս Մետապնևմովիրուսի համար հատուկ հակավիրուսային բուժում կամ պատվաստանյութ չկա: Ծանր դեպքերում հոսպիտալացումը կարող է անհրաժեշտ լինել թթվածնային թերապիայի կամ մեխանիկական օդափոխության համար:
Հարկավոր է հետևել վարակի վերահսկման պարզ միջոցներին, որոնք կիրառելի են մի շարք շնչառական հիվանդությունների դեպքում՝
- Մնացեք տանը, եթե լավ չեք զգում ձեզ
- Դիմակ կրեք մարդաշատ և վատ օդափոխվող տարածքներում
- Հազալիս և փռշտալիս անձեռոցիկով կամ արմունկով ծածկեք բերանը
- Պարբերաբար լվացեք և ախտահանեք ձեռքերը
- Մաքրեք և ախտահանեք մակերեսները, ինչպիսիք են՝ դռան բռնակները, հեռախոսները և ստեղնաշարերը:
Թեև վիրուսից հնարավոր չէ ամբողջությամբ խուսափել, սակայն այս քայլերին հետևելը կարող է զգալիորեն նվազեցնել վարակվելու և տարածման ռիսկը։
Այլ տարածված վիրուսների մասին լրացուցիչ տեղեկությունների համար կարդացեք մեր առողջապահական բլոգը: Եղե՛ք տեղեկացված և առողջ:
