Անձնական հիգիենան հղիության ընթացքում, կարևոր խորհուրդներ ապագա մայրիկներին

Հղիության շրջանը բնութագրվում է ֆիզիկական և հորմոնալ բազմաթիվ փոփոխություններով, ինչը պահանջում է ավելի մեծ ուշադրություն անձնական հիգիենայի նկատմամբ։ Այս ժամանակահատվածում մոր առողջությունը գտնվում է առաջնային պլանում, քանի որ այն անմիջական ազդեցություն ունի նաև պտղի վրա։ Ստորև ներկայացված են մի շարք կարևոր ուղեցույցներ, որոնք կարող են նպաստել հղիության շրջանում պատշաճ հիգիենայի պահպանմանը։

Ձեռքերի հիգիենա

Հղիության ընթացքում կնոջ իմունային համակարգը որոշակի փոփոխությունների է ենթարկվում, ինչի արդյունքում նա դառնում է ավելի խոցելի մանրէների և վիրուսների նկատմամբ։ Այս պատճառով խորհուրդ է տրվում առավել հաճախակի լվանալ ձեռքերը՝ հատկապես հասարակական վայրերում գտնվելուց, սնունդ ընդունելուց առաջ կամ զուգարանից օգտվելուց հետո։

Ճանապարհային պայմաններում հարմար է ունենալ ալկոհոլային հիմքով ձեռքերի հիպոալերգիկ ախտահանիչ՝ նախընտրելով նուրբ և մաշկը չչորացնող ախտահանիչներ։

Ինտիմ հիգիենա

Հորմոնալ փոփոխությունները հղիության ընթացքում կարող են հանգեցնել ինտիմ գոտու գրգռվածության, ավելորդ արտադրության կամ զգայունության։ Անհրաժեշտ է օգտագործել նեյտրալ pH ունեցող ինտիմ հիգիենայի միջոցներ՝ խուսափելով ուժեղ բույրերով կամ գրգռող բաղադրությամբ արտադրանքներից։

Ներքին լվացումները խորհուրդ չեն տրվում, քանի որ դրանք կարող են խաթարել բնական միկրոֆլորան և բարձրացնել վարակների առաջացման ռիսկը։

Մաշկի խնամք

Մաշկը հղիության ընթացքում կարող է դառնալ ավելի չոր կամ գրգռվածության հակված ։ Խորհուրդ է տրվում օգտագործել բնական կամ հիպոալերգիկ բաղադրությամբ փրփուր օճառներ և ախտահանիչ միջոցներ։ Սուր բույրերով գերհագեցած կամ սուլֆատ պարունակող ապրանքները ցանկալի է բացառել՝ մաշկի գերզգայունությունից խուսափելու համար։

Բերանի խոռոչի հիգիենա

Հղիության ընթացքում բերանի խոռոչում հաճախ հանդիպում են բորբոքային երևույթներ, ինչպես օրինակ՝ արյունահոսող լնդեր։ Խորհուրդ է տրվում օգտագործել փափուկ խոզանակ և ատամի մածուկ՝ հատուկ ընտրված հղի կանանց համար։ Բացի դրանից, նպատակահարմար է հղիության ընթացքում գոնե մեկ անգամ այցելել ատամնաբուժին։

Հագուստ և անձնական պարագաներ

Խորհուրդ է տրվում նախապատվությունը տալ բամբակյա, հիգիենիկ ներքնաշորին և շնչող հագուստին։ Ակտիվ շարժվելուց ու նույնիսկ թեթևակի քրտնելուց հետո ցանկալի է փոխել հագուստը՝ մաշկի գրգռվածությունից կամ բակտերիաների բազմացումից խուսափելու համար։ Անձնական սրբիչների և խոնավ անձեռոցիկների առկայությունը հատկապես կարևոր է ճանապարհին լինելիս։

Հղիության ընթացքում պատշաճ հիգիենան ոչ միայն օգնում է պաշտպանվել վարակներից, այլ նաև նպաստում է մոր և պտղի ընդհանուր բարեկեցությանը։ Պարզ և հետևողական խնամքը, համապատասխան միջոցների ճիշտ ընտրությունն ու հիգիենայի վերաբերյալ տեղեկացվածությունը կարող են զգալիորեն բարելավել հղիության ընթացքն ու այն դարձնել ավելի թեթև։